ਹੁਨਰਮੰਦ ਕਿੱਤਿਆਂ ਲਈ ਸਿਖਲਾਈ

ਕਾਰਪੈਂਟਰਾਂ, ਕਰੇਨ ਔਪਰੇਟਰਾਂ ਤੋਂ ਲੈ ਕੇ ਵੈਲਡਰਾਂ ਤੱਕ – ਹੁਨਰਮੰਦ ਕਿੱਤੇ ਉੱਚ-ਮੰਗ ਵਾਲੀਆਂ, ਵਧੀਆ ਤਨਖ਼ਾਹ ਵਾਲੀਆਂ ਨੌਕਰੀਆਂ ਵਿੱਚ ਕੰਮ ਦੇ ਕਈ ਮੌਕੇ ਉਪਲਬਧ ਕਰਦੇ ਹਨ।

ਕੀ ਤੁਹਾਨੂੰ ਚੀਜ਼ਾਂ ਬਣਾਉਣ, ਤਿਆਰ ਕਰਨ, ਠੀਕ ਕਰਨ ਜਾਂ ਕਿਸੇ ਹੁਨਰ ਵਿੱਚ ਮੁਹਾਰਤ ਹਾਸਲ ਕਰਨ ਦਾ ਸ਼ੌਕ ਹੈ – ਅਤੇ ਕੀ ਤੁਸੀਂ ਚਾਹੁੰਦੇ ਹੋ ਕਿ ਤੁਹਾਨੂੰ ਇਸ ਲਈ ਭੁਗਤਾਨ ਵੀ ਮਿਲੇ? ਅਜਿਹਾ ਕਰਨ ਲਈ 100 ਤਰ੍ਹਾਂ ਦੇ ਹੁਨਰਮੰਦ ਕਿੱਤੇ ਉਪਲਬਧ ਹਨ!

ਆਪਣੀਆਂ ਦਿਲਚਸਪੀਆਂ ਨੂੰ ਮੁਮਕਿਨ ਹੁਨਰਮੰਦ ਕਿੱਤਿਆਂ ਨਾਲ ਮਿਲਾਉਣ ਲਈ ਕੁਇਜ਼ ਵਿੱਚ ਭਾਗ ਲਓ, ਫਿਰ ਹੋਰ ਜਾਣਨ ਲਈ ਪ੍ਰੋਫ਼ਾਈਲਾਂ ਪੜ੍ਹੋ।

ਹੁਨਰਮੰਦ ਕਿੱਤਿਆਂ ਵਿੱਚ ਆਪਣਾ ਸਫ਼ਰ ਸ਼ੁਰੂ ਕਰਨ ਲਈ ਕੋਈ ਵੀ ਸਮਾਂ ਜ਼ਿਆਦਾ ਜਲਦੀ ਨਹੀਂ ਹੈ। ‘ਯੂਥ ਇਨ ਟ੍ਰੇਡਜ਼’ ਪ੍ਰੋਗਰਾਮ ਤੁਹਾਨੂੰ ਹਾਈ ਸਕੂਲ ਵਿੱਚ ਹੀ ਅੱਗੇ ਵੱਧਣ ਦਾ ਮੌਕਾ ਦਿੰਦੇ ਹਨ।

ਇਸਦਾ ਮਤਲਬ ਹੈ ਕਿ ਤੁਸੀਂ ਗ੍ਰੈਜੂਏਟ ਹੋਣ ਤੋਂ ਪਹਿਲਾਂ ਹੀ ਆਪਣੇ ਖੇਤਰ ਵਿੱਚ ਕੰਮ ਕਰ ਰਹੇ ਹੋ ਸਕਦੇ ਹੋ, ਮਾਹਰਾਂ ਤੋਂ ਸਿੱਖ ਰਹੇ ਹੋ ਸਕਦੇ ਹੋ – ਅਤੇ ਹੋ ਸਕਦਾ ਹੈ ਕਿ ਤੁਸੀਂ ਤਨਖ਼ਾਹ ਵੀ ਕਮਾ ਰਹੇ ਹੋਵੋ।

ਔਰਤਾਂ ਅਤੇ ਘੱਟ ਪ੍ਰਤਿਨਿਧਿਤਾ ਵਾਲੇ ਵਰਗ, ਕੰਮਕਾਜ ਵਾਲੀ ਥਾਂ ‘ਤੇ ਨਵੇਂ ਵਿਚਾਰ, ਤਾਜ਼ਾ ਨਜ਼ਰੀਏ ਅਤੇ ਵਧੇਰੇ ਸਹਿਯੋਗ ਲਿਆਉਂਦੇ ਹਨ।

ਹੁਨਰਮੰਦ ਕਿੱਤਿਆਂ ਵਿੱਚ ਲਾਭਦਾਇਕ ਪੇਸ਼ਾ ਸ਼ੁਰੂ ਕਰਨ ਜਾਂ ਉਸਨੂੰ ਅੱਗੇ ਵਧਾਉਣ ਲਈ ਲੋੜੀਂਦੀ ਜਾਣਕਾਰੀ, ਸੰਬੰਧ ਅਤੇ ਹੁਨਰ ਹਾਸਲ ਕਰਨ ਵਿੱਚ ਮਦਦ ਕਰਨ ਲਈ ਪ੍ਰੋਗਰਾਮ ਉਪਲਬਧ ਹਨ।

ਸਿੱਖਦੇ ਹੋਏ ਕਮਾਈ ਕਰੋ! ਅਪਰੈਂਟਿਸਸ਼ਿਪ ਵਿੱਚ ਤਨਖ਼ਾਹ ਵਾਲੀ ਔਨ-ਦ-ਜੌਬ ਸਿਖਲਾਈ ਨੂੰ ਕਲਾਸਰੂਮ ਸਿਖਲਾਈ ਨਾਲ ਜੋੜਿਆ ਜਾਂਦਾ ਹੈ, ਜੋ ਤੁਹਾਨੂੰ ਹੁਨਰਮੰਦ ਕਿੱਤੇ ਵਿੱਚ ਪ੍ਰਮਾਣਿਕਤਾ ਹਾਸਲ ਕਰਨ ਤੱਕ ਲੈ ਜਾਂਦੀ ਹੈ।

ਜ਼ਿਆਦਾਤਰ ਅਪਰੈਂਟਿਸਸ਼ਿਪਾਂ ਲਗਭਗ 4 ਸਾਲਾਂ ਤੱਕ ਮੁਕੰਮਲ ਹੁੰਦੀਆਂ ਹਨ। ਤਕਰੀਬਨ 80% ਸਿਖਲਾਈ ਸਰਟੀਫਾਈਡ ਜਰਨੀਪਰਸਨ ਦੀ ਦੇਖ-ਰੇਖ ਹੇਠ ਕੰਮ ਕਰਦਿਆਂ ਹੁੰਦੀ ਹੈ, ਅਤੇ 20% ਕਲਾਸਰੂਮ ਵਿੱਚ।

ਰਜਿਸਟਰਡ ਅਪਰੈਂਟਿਸ ਆਪਣੀ ਸਿਖਲਾਈ ਦੇ ਕਲਾਸਰੂਮ ਹਿੱਸੇ ਦੌਰਾਨ ਟਿਊਸ਼ਨ ਅਤੇ ਰਹਿਣ-ਸਹਿਣ ਦੇ ਖਰਚੇ ਪੂਰੇ ਕਰਨ ਲਈ ਆਰਥਿਕ ਸਹਾਇਤਾ ਅਤੇ ਟੈਕਸ ਕ੍ਰੈਡਿਟ ਲਈ ਅਰਜ਼ੀ ਦੇ ਸਕਦੇ ਹਨ।

ਜਦੋਂ ਤੁਸੀਂ ਆਪਣੀ ਅਪਰੈਂਟਿਸਸ਼ਿਪ ਪੂਰੀ ਕਰ ਲੈਂਦੇ ਹੋ, ਤਾਂ ਤੁਸੀਂ ਪ੍ਰਮਾਣਿਤ ਹੋਣ ਲਈ ਇਕ ਪ੍ਰੀਖਿਆ ਦੇ ਸਕਦੇ ਹੋ। ਸਰਟੀਫ਼ਿਕੇਸ਼ਨ ਆਫ਼ ਕੁਆਲੀਫ਼ਿਕੇਸ਼ਨ ਇਹ ਦਰਸਾਉਂਦਾ ਹੈ ਕਿ ਤੁਸੀਂ ਬੀ.ਸੀ. ਦੇ ਉੱਚ ਹੁਨਰਮੰਦ ਕਿੱਤਿਆਂ ਦੇ ਮਾਪਦੰਡਾਂ ‘ਤੇ ਖਰੇ ਉਤਰਦੇ ਹੋ।

ਪ੍ਰਮਾਣਿਕਤਾ ਤੁਹਾਡੇ ਲਈ ਹੋਰ ਮੌਕਿਆਂ ਦੇ ਦਰਵਾਜ਼ੇ ਖੋਲ੍ਹਦੀ ਹੈ – ਤਰੱਕੀਆਂ, ਆਪਣਾ ਕਾਰੋਬਾਰ ਸ਼ੁਰੂ ਕਰਨਾ, ਅਪਰੈਂਟਿਸਾਂ ਦੀ ਸੰਭਾਲ ਕਰਨਾ ਜਾਂ ਹੋਰ ਸੂਬਿਆਂ ਵਿੱਚ ਕੰਮ ਕਰਨਾ। ਕੁਝ ਹੁਨਰਮੰਦ ਕਿੱਤਿਆਂ ਲਈ ਹੁਣ ਇਹ ਲਾਜ਼ਮੀ ਹੈ।