ਇੱਕ ਮਜ਼ਬੂਤ ਆਰਥਿਕਤਾ ਵਿੱਚ ਚੰਗੀਆਂ ਨੌਕਰੀਆਂ ਅਤੇ ਸਿਖਲਾਈ

ਵਰਕ ਬੀ ਸੀ (WorkBC) ਬ੍ਰਿਟਿਸ਼ ਕੋਲੰਬੀਆ ਵਿੱਚ ਕੰਮ ਦੀ ਦੁਨੀਆ ਵਿੱਚ ਤੁਹਾਨੂੰ ਸਿੱਧੀ ਪਹੁੰਚ ਪ੍ਰਦਾਨ ਕਰਦਾ ਹੈ। ਇਸਦਾ ਮੁੱਖ ਟੀਚਾ ਸਾਰੇ ਬ੍ਰਿਟਿਸ਼ ਕੋਲੰਬੀਆ ਵਾਸੀਆਂ ਲਈ ਬੀ.ਸੀ. ਦੀ ਲੇਬਰ ਮਾਰਕਿਟ ਵਿੱਚ ਕਾਮਯਾਬੀ ਨਾਲ ਮਾਰਗਦਰਸ਼ਨ ਪ੍ਰਦਾਨ ਕਰਨ ਵਿੱਚ ਮਦਦ ਕਰਨਾ ਹੈ। ਵਰਕ ਬੀ ਸੀ ਨੌਕਰੀ ਲੱਭਣ ਵਾਲਿਆਂ ਅਤੇ ਰੁਜ਼ਗਾਰ ਦੇਣ ਵਾਲਿਆਂ ਨੂੰ ਜੋੜਦਾ ਹੈ – ਲੋਕਾਂ ਨੂੰ ਨੌਕਰੀਆਂ ਲੱਭਣ, ਕਰੀਅਰ ਦੇ ਵਿਕਲਪਾਂ ਦੀ ਪੜਚੋਲ ਕਰਨ ਅਤੇ ਉਨ੍ਹਾਂ ਦੇ ਹੁਨਰਾਂ ਨੂੰ ਬਿਹਤਰ ਬਣਾਉਣ ਵਿੱਚ ਮਦਦ ਕਰਦਾ ਹੈ, ਅਤੇ ਰੁਜ਼ਗਾਰ ਦੇਣ ਵਾਲਿਆਂ ਨੂੰ ਸਹੀ ਹੁਨਰਮੰਦ ਕਾਮੇ ਲੱਭਣ ਅਤੇ ਉਨ੍ਹਾਂ ਦੇ ਕਾਰੋਬਾਰਾਂ ਨੂੰ ਵਧਾਉਣ ਵਿੱਚ ਸਹਾਇਤਾ ਕਰਦਾ ਹੈ।

ਸਰਟੀਫ਼ਾਈਡ (ਪ੍ਰਮਾਣਿਤ) ਹੋਣਾ ਮੌਕਿਆਂ ਦੀ ਦੁਨੀਆ ਦੇ ਦਰਵਾਜ਼ੇ ਖੋਲ੍ਹਦਾ ਹੈ – ਇੱਕ ਉੱਦਮਕਰਤਾ (entrepreneur) ਤੋਂ ਲੈ ਕੇ ਤਰੱਕੀ ਪ੍ਰਾਪਤ ਕਰਨ, ਇੱਕ ਨਵਾਂ ਮੌਕਾ ਲੱਭਣ ਜਾਂ ਇੱਕ ਸਲਾਹਕਾਰ ਬਣਨ ਤੱਕ। ‘ਰੈੱਡ ਸੀਲ ਐਂਡੋਰਸਮੈਂਟ’ (Red Seal Endorsement) ਜਾਂ ਯੋਗਤਾ ਦਾ ਪ੍ਰਮਾਣੀਕਰਨ (Certification of Qualification) ਲੈਣਾ ਬੀ.ਸੀ. ਵਿੱਚ ਹੁਨਰਮੰਦ ਕਿੱਤਿਆਂ ਦੇ ਉੱਚ ਮਿਆਰ ਨੂੰ ਦਰਸਾਉਂਦਾ ਹੈ।

ਬੀ.ਸੀ. ਦੀ ‘ਸਟ੍ਰੌਂਗਰ ਬੀ ਸੀ ਫਿਊਚਰ ਰੈਡੀ ਕਾਰਵਾਈ ਯੋਜਨਾ’ (StrongerBC Future Ready Action Plan) ਅੱਜ ਦੀਆਂ ਚੁਣੌਤੀਆਂ ਨਾਲ ਨਜਿੱਠਣ ਲਈ ਅਨੁਕੂਲ ਹੈ, ਇਹ ਯਕੀਨੀ ਬਣਾ ਰਹੀ ਹੈ ਕਿ ਲੋਕ ਸਫਲ ਹੋਣ ਲਈ ਤਿਆਰ ਹਨ, ਅਤੇ ਭਵਿੱਖ ਵਿੱਚ ਸਾਡੀ ਮਜ਼ਬੂਤ, ਟਿਕਾਊ ਆਰਥਿਕਤਾ ਵਿੱਚ ਵਾਧਾ ਕਰ ਰਹੇ ਹਨ। ਯੋਜਨਾ ਨੂੰ ਪੜ੍ਹਨ ਲਈ ਹੇਠਾਂ ਕਲਿੱਕ ਕਰੋ।

ਅਸੀਂ ਵਧੇਰੇ ਰਿਹਾਇਸ਼ਾਂ, ਸਕੂਲ, ਹਸਪਤਾਲ ਅਤੇ ਟ੍ਰਾਂਜ਼ਿਟ ਦਾ ਨਿਰਮਾਣ ਕਰਕੇ ਅਤੇ ਇਨ੍ਹਾਂ ਨੂੰ ਉਪਲਬਧ ਕਰਵਾ ਕੇ ਆਪਣੀਆਂ ਵਰਤਮਾਨ ਅਤੇ ਭਵਿੱਖ ਦੀਆਂ ਓਨਾਂ ਜ਼ਰੂਰਤਾਂ ਲਈ ਤਿਆਰੀ ਕਰ ਰਹੇ ਹਾਂ ਜਿਸ ‘ਤੇ ਸਾਡੇ ਭਾਈਚਾਰੇ ਨਿਰਭਰ ਕਰਦੇ ਹਨ। ਬੱਜਟ 2024 ਦੇ ਹਿੱਸੇ ਵਜੋਂ, ਇਹ ਪ੍ਰੋਜੈਕਟ ਅਗਲੇ ਤਿੰਨ ਸਾਲਾਂ ਵਿੱਚ ਸੂਬੇ ਭਰ ਵਿੱਚ ਅਨੁਮਾਨਤ 185,000 ਨੌਕਰੀਆਂ ਪੈਦਾ ਕਰਨਗੇ, ਤਾਂ ਜੋ ਹਰ ਕੋਈ ਇੱਥੇ ਬੀ.ਸੀ. ਵਿੱਚ ਵਧੀਆ ਜ਼ਿੰਦਗੀ ਗੁਜ਼ਾਰ ਸਕੇ।

ਬੀ.ਸੀ. ਦੇ ਲੋਕ ਅਜਿਹੀ ਪਬਲਿਕ ਹੈਲਥ ਕੇਅਰ ਚਾਹੁੰਦੇ ਹਨ ਜਿਸ ‘ਤੇ ਉਹ ਭਰੋਸਾ ਕਰ ਸਕਣ। ਅਜਿਹੀ ਅਬਾਦੀ ਦੀਆਂ ਮੰਗਾਂ ਨੂੰ ਪੂਰਾ ਕਰਨ ਲਈ, ਜੋ ਉਮਰ ਅਤੇ ਗਿਣਤੀ ਵਿੱਚ ਵੱਧ ਰਹੀ ਹੈ, ਸਾਨੂੰ ਹੈਲਥ ਕੇਅਰ ਦੇ ਖੇਤਰ ਵਿੱਚ ਕੰਮ ਕਰਨ ਲਈ ਵਧੇਰੇ ਲੋਕਾਂ ਦੀ ਜ਼ਰੂਰਤ ਹੈ। ਇਹੀ ਕਾਰਨ ਹੈ ਕਿ ਬੱਜਟ 2024 ਉਨ੍ਹਾਂ ਕਾਮਿਆਂ ਨੂੰ ਆਕਰਸ਼ਿਤ ਕਰਨ ਲਈ ਵਧੇਰੇ ਪ੍ਰੋਤਸਾਹਨ ਪ੍ਰਦਾਨ ਕਰਦਾ ਹੈ ਜਿਨ੍ਹਾਂ ਦੀ ਸਾਨੂੰ ਲੋੜ ਹੈ ਅਤੇ ਜਿਨ੍ਹਾਂ ਨੂੰ ਅਸੀਂ ਸਿਹਤ ਸੇਵਾਵਾਂ ਦੀ ਪੂਰੀ ਲੜੀ ਵਿੱਚ ਬਰਕਰਾਰ ਰੱਖਣਾ ਚਾਹੁੰਦੇ ਹਾਂ। ਇਸ ਵਿੱਚ ਪ੍ਰਾਇਮਰੀ ਅਤੇ ਐਕਿਊਟ ਕੇਅਰ, ਲੌਂਗ-ਟਰਮ ਕੇਅਰ ਅਤੇ ਅਸਿਸਟਿਡ ਲਿਵਿੰਗ, ਹੋਮ ਕੇਅਰ, ਅਤੇ ਮਾਨਸਿਕ ਸਿਹਤ ਅਤੇ ਨਸ਼ੀਲੇ ਪਦਾਰਥਾਂ ਦੀ ਵਰਤੋਂ ਸੰਬੰਧੀ ਸੰਭਾਲ ਸ਼ਾਮਲ ਹੈ।

ਉੱਚ ਸਿੱਖਿਆ ਪ੍ਰਾਪਤ ਕਰਨ ਲਈ ਵਧੇਰੇ ਸਹਾਇਤਾ ਅਤੇ ਢੁੱਕਵੇਂ ਵਸੀਲਿਆਂ ਦੀ ਭਾਲ ਕਰਨ ਵਾਲੇ ਲੋਕ ਵਿਦਿਆਰਥੀ ਕਰਜ਼ਿਆਂ ਅਤੇ ਬਿਹਤਰ ਭੁਗਤਾਨ ਦੀਆਂ ਸ਼ਰਤਾਂ ਰਾਹੀਂ ਵਧੇਰੇ ਪੈਸੇ ਪ੍ਰਾਪਤ ਕਰਨ ਦੇ ਯੋਗ ਹਨ। 2019 ਤੋਂ ਬੀ.ਸੀ. ਦੇ ਵਿਦਿਆਰਥੀ ਕਰਜ਼ੇ ਵਿਆਜ-ਮੁਕਤ ਹੋਣ ਨਾਲ – ਅੱਜ ਤੱਕ ਹਜ਼ਾਰਾਂ ਬ੍ਰਿਟਿਸ਼ ਕੋਲੰਬੀਆ ਵਾਸੀਆਂ ਨੂੰ $145 ਮਿਲੀਅਨ ਦੀ ਬਚਤ ਹੋਈ ਹੈ – ਬੀ.ਸੀ. ਵਿੱਚ ਸਿੱਖਿਆ ਪ੍ਰਾਪਤ ਕਰਨ ਵਾਲੇ ਲੋਕਾਂ ਨੂੰ ਵਧੇਰੇ ਅਨੁਕੂਲ ਵਸੀਲੇ ਅਤੇ ਵਿਕਲਪਾਂ ਤੱਕ ਪਹੁੰਚ ਹੋਵੇਗੀ ਤਾਂ ਜੋ ਉਹ ਪੜ੍ਹਾਈ ਜਾਰੀ ਰੱਖ ਸਕਣ ਅਤੇ ਸਫਲ ਹੋ ਸਕਣ।

ਹੋਰ ਵਿਦਿਆਰਥੀਆਂ ਦੀ ਉੱਚ ਮੰਗ ਵਾਲੇ ਪ੍ਰੋਗਰਾਮਾਂ ਤੱਕ ਪਹੁੰਚ ਹੋਵੇਗੀ ਕਿਉਂਕਿ ਪਬਲਿਕ ਪੋਸਟ-ਸੈਕੰਡਰੀ ਸਿੱਖਿਆ ਪ੍ਰਣਾਲੀ ਵਿੱਚ 3,000 ਹੋਰ ਤਕਨਾਲੋਜੀ-ਸੰਬੰਧਿਤ ਥਾਂਵਾਂ ਉਪਲਬਧ ਹੋ ਜਾਣਗੀਆਂ। ਇਨ੍ਹਾਂ ਥਾਂਵਾਂ ਵਿੱਚ ਸਾਈਬਰ ਸਿਕਿਓਰਿਟੀ, ਸੌਫਟਵੇਅਰ ਇੰਜੀਨੀਅਰਿੰਗ, ਡੇਟਾ ਸਾਇੰਸ, ਜੀਵਨ ਵਿਗਿਆਨ (life sciences), ਕ੍ਰੀਏਟਿਵ ਟੈਕ, ਕਲੀਨ ਟੈਕ ਅਤੇ ਐਗਰੀਟੈਕ ਸਮੇਤ ਕਈ ਖੇਤਰ ਸ਼ਾਮਲ ਹਨ।

ਸਕੂਲ ਸਾਡੇ ਭਾਈਚਾਰਿਆਂ ਦਾ ਧੁਰ ਹਨ। ਇੱਥੇ ਬੀ.ਸੀ. ਵਿੱਚ, ਅਸੀਂ K-12 ਦਾਖਲੇ ਵਿੱਚ ਨਿਰੰਤਰ ਵਾਧਾ ਦੇਖ ਰਹੇ ਹਾਂ। ਸਾਡੀ ਵੱਧ ਰਹੀ ਵਿਦਿਆਰਥੀ ਅਬਾਦੀ ਦਾ ਸਮਰਥਨ ਕਰਨ ਲਈ, ਅਸੀਂ ਵਧੇਰੇ ਅਧਿਆਪਕਾਂ ਅਤੇ ਸਹਾਇਤਾ ਸਟਾਫ ਦੀ ਭਰਤੀ ਕਰ ਰਹੇ ਹਾਂ। ਇਸ ਵਿੱਚ ਸਪੈਸ਼ਲ ਐਜੂਕੇਸ਼ਨ ਦੇ ਅਧਿਆਪਕ, ਅਧਿਆਪਕ ਸਾਇਕੌਲੋਜਿਸਟ (ਮਨੋਵਿਗਿਆਨੀ) ਅਤੇ ਕਾਊਂਸਲਰ ਸ਼ਾਮਲ ਹਨ। ਅਸੀਂ ਬੀ.ਸੀ. ਭਰ ਵਿੱਚ ਸਕੂਲਾਂ ਅਤੇ ਖੇਡ ਦੇ ਮੈਦਾਨਾਂ ਦਾ ਨਿਰਮਾਣ, ਵਿਸਤਾਰ ਅਤੇ ਅਪਗ੍ਰੇਡ ਕਰਨਾ ਵੀ ਜਾਰੀ ਰੱਖ ਰਹੇ ਹਾਂ।

ਬੀ.ਸੀ. ਨੂੰ ਵਧੇਰੇ ਵੈਟਰੀਨੇਰੀਅਨਾਂ (ਪਸ਼ੂਆਂ ਦੇ ਡਾਕਟਰ) ਦੀ ਲੋੜ ਹੈ। ਨਵੀਂ ਫੰਡਿੰਗ ‘ਵੈਸਟਰਨ ਕਾਲਜ ਔਫ ਵੈਟਰਨਰੀ ਮੈਡੀਸਨ’ (Western College of Veterinary Medicine) ਵਿੱਚ ਬੀ.ਸੀ. ਦੇ ਵਿਦਿਆਰਥੀਆਂ ਲਈ ਸਬਸਿਡੀ ਵਾਲੀਆਂ ਵੈਟਰਨਰੀ ਮੈਡੀਸਨ ਸੀਟਾਂ ਨੂੰ ਸਥਾਈ ਤੌਰ ‘ਤੇ ਦੁੱਗਣਾ ਕਰ ਦੇਵੇਗੀ। ਵਧੇਰੇ ਲੋਕਾਂ ਨੂੰ ਗੁਣਵੱਤਾ ਵਾਲੀ ਸਿਖਲਾਈ ਮਿਲੇਗੀ, ਅਤੇ ਸਾਡੇ ਪਾਲਤੂ ਜਾਨਵਰਾਂ ਅਤੇ ਫ਼ਾਰਮ ਦੇ ਜਾਨਵਰਾਂ ਨੂੰ ਉਹ ਸਿਹਤ ਸੰਭਾਲ ਮਿਲ ਸਕਦੀ ਹੈ ਜਿਸਦੀ ਉਨ੍ਹਾਂ ਨੂੰ ਲੋੜ ਹੈ।

ਹੁਨਰਮੰਦ ਲੋਕਾਂ ਦੀ ਅਗਲੀ ਪੀੜ੍ਹੀ ਦਾ ਵਿਕਾਸ ਕਰਨਾ ਬੀ.ਸੀ. ਦੀ ਸਮੁੱਚੀ ਉਤਪਾਦਕਤਾ ਅਤੇ ਮੁਕਾਬਲੇਬਾਜ਼ੀ ਲਈ ਜ਼ਰੂਰੀ ਹੈ। ਆਰਥਿਕਤਾ ਵਿੱਚ, ਨਵੀਨਤਾ ਲਈ ਸਾਡੀ ਸਮਰੱਥਾ ਮਾਸਟਰਜ਼ ਅਤੇ ਡਾਕਟਰੇਟ ਡਿਗਰੀ ਵਾਲੇ ਵਿਸ਼ੇਸ਼ ਗ੍ਰੈਜੂਏਟਾਂ ਦੀ ਨਿਰੰਤਰ ਸਪਲਾਈ ‘ਤੇ ਨਿਰਭਰ ਕਰਦੀ ਹੈ। ਅਸੀਂ ਵਿਗਿਆਨ, ਤਕਨਾਲੋਜੀ, ਇੰਜੀਨੀਅਰਿੰਗ, ਅਤੇ ਗਣਿਤ (STEM) ਖੇਤਰਾਂ ਅਤੇ ਹੋਰ ਵਿਸ਼ਿਆਂ ਵਿੱਚ ਵਿਦਿਆਰਥੀਆਂ ਲਈ ਮੈਰਿਟ-ਅਧਾਰਤ ਗ੍ਰੈਜੂਏਟ ਸਕੌਲਰਸ਼ਿਪ ਦਾ ਵਿਸਤਾਰ ਕਰਕੇ ਹੁਨਰਮੰਦ ਲੋਕਾਂ ਦੀ ਅਗਲੀ ਪੀੜ੍ਹੀ ਨੂੰ ਬੀ.ਸੀ. ਵਿੱਚ ਤਿਆਰ ਕਰ ਰਹੇ ਹਾਂ।

ਬੀ.ਸੀ. ਵਿੱਚ ਪਰਿਵਾਰਾਂ ਨੂੰ ਸਾਡੇ ਅਰਲੀ ਚਾਈਲਡਹੁੱਡ ਕਾਰਜਬਲ ਵਿੱਚ ਨਿਵੇਸ਼ ਕਰਕੇ ਲੋੜੀਂਦੀ ਬਾਲ ਸੰਭਾਲ ਪ੍ਰਦਾਨ ਕਰਨਾ।

ਜਦ ਅਸੀਂ ਮਾਪਿਆਂ ਲਈ ਚਾਈਲਡ ਕੇਅਰ (ਬਾਲ ਸੰਭਾਲ) ਤੱਕ ਪਹੁੰਚ ਦਾ ਵਿਸਤਾਰ ਕਰ ਰਹੇ ਹਾਂ, ਅਗਲੇ ਦਹਾਕੇ ਵਿੱਚ ਬੀ.ਸੀ. ਦੇ ਕਾਰਜਬਲ ਵਿੱਚ 10,000 ਤੋਂ ਵੱਧ ਨਵੇਂ ਅਰਲੀ ਚਾਈਲਡਹੁੱਡ ਐਜੁਕੇਟਰਾਂ ਦੀ ਲੋੜ ਪਵੇਗੀ। ਸਿਖਲਾਈ ਲਈ ਫੰਡਿੰਗ, ਅਤੇ ਪੋਸਟ-ਸੈਕੰਡਰੀ ਪ੍ਰੋਗਰਾਮਾਂ ਵਿੱਚ ਨਵੀਆਂ ਸੀਟਾਂ ਦੇ ਨਾਲ, ਅਰਲੀ ਚਾਈਲਡਹੁੱਡ ਐਜੁਕੇਟਰ ਬਣਨ ਲਈ ਸਿਖਲਾਈ ਦੇਣ ਦਾ ਇਸ ਤੋਂ ਵਧੀਆ ਸਮਾਂ ਨਹੀਂ ਹੈ।

ਬੀ.ਸੀ. ਦੇ ਵਿਦਿਆਰਥੀਆਂ ਨੂੰ ਉਨ੍ਹਾਂ ਦੀਆਂ ਦਿਲਚਸਪੀਆਂ ਅਤੇ ਕੰਮਾਂ ਨਾਲ ਮੇਲ ਖਾਂਦੇ ਉੱਚ ਮੰਗ ਵਾਲੇ ਕਰੀਅਰ ਲੱਭਣ ਅਤੇ ਪੜਚੋਲ ਕਰਨ ਦੇ ਵਧੇਰੇ ਮੌਕੇ ਦੇਣਾ, ਸਟ੍ਰੌਂਗਰ ਬੀ ਸੀ ਫਿਊਚਰ ਰੈਡੀ ਕਾਰਵਾਈ ਯੋਜਨਾ ਦਾ ਇੱਕ ਮੁੱਖ ਹਿੱਸਾ ਹੈ। ਇਹ ਪਹਿਲਕਦਮੀਆਂ ਹਾਈ ਸਕੂਲ ਤੋਂ ਗ੍ਰੈਜੂਏਟ ਹੋਣ ਅਤੇ ਪੋਸਟ-ਸੈਕੰਡਰੀ ਸਿੱਖਿਆ ਵਿੱਚ ਤਬਦੀਲ ਹੋਣ ਲਈ ਤਿਆਰ ਹੋਣ ਵਿੱਚ ਵਧੇਰੇ ਵਿਦਿਆਰਥੀਆਂ ਦੀ ਮਦਦ ਕਰਦੀਆਂ ਹਨ, ਅਤੇ ਉੱਚ ਮੰਗ ਵਾਲੇ ਖੇਤਰਾਂ ਵਿੱਚ ਨੌਕਰੀਆਂ ਲੱਭਣ ਲਈ ਲੋੜੀਂਦੇ ਹੁਨਰ ਮੁਹਈਆ ਕਰਦੀਆਂ ਹਨ।

ਵਰਕ-ਇੰਟੀਗ੍ਰੇਟਿਡ ਲਰਨਿੰਗ ਜਾਂ ਕੰਮ ਏਕੀਕ੍ਰਿਤ ਸਿਖਲਾਈ (ਸਿੱਖਿਆ ਲਈ ਇੱਕ ਅਜਿਹੀ ਪਹੁੰਚ ਜੋ ਵਿਦਿਆਰਥੀਆਂ ਨੂੰ ਕਲਾਸਰੂਮ ਵਿੱਚ ਜੋ ਕੁਝ ਉਹ ਸਿੱਖ ਰਹੇ ਹਨ, ਉਸ ਨਾਲ ਸਬੰਧਤ ਕੰਮ ਦੇ ਤਜਰਬੇ ਮੁਹਈਆ ਕਰਦੀ ਹੈ) ਦੇ ਮੌਕੇ ਵਿਦਿਆਰਥੀਆਂ ਨੂੰ ਸੰਬੰਧਿਤ ਕੰਮ ਦਾ ਤਜਰਬਾ ਪ੍ਰਾਪਤ ਕਰਨ ਦਾ ਇੱਕ ਵਧੀਆ ਮੌਕਾ ਪ੍ਰਦਾਨ ਕਰਦੇ ਹਨ, ਅਤੇ ਰੁਜ਼ਗਾਰ ਦੇਣ ਵਾਲਿਆਂ ਨੂੰ ਲੋੜ ਅਨੁਸਾਰ ਹੁਨਰਮੰਦ ਕਾਮਿਆਂ ਦੀ ਕਮੀ ਨੂੰ ਦੂਰ ਕਰਨ ਅਤੇ ਕਾਮਿਆਂ ਦੀ ਅਗਲੀ ਪੀੜ੍ਹੀ ਨੂੰ ਸਿਖਲਾਈ ਦੇਣ ਵਿੱਚ ਵੀ ਮਦਦ ਕਰਦੇ ਹਨ। ਬੀ.ਸੀ. ਦੇ ਹਰ ਕੋਨੇ ਵਿੱਚ ਵਧੇਰੇ ਵਿਦਿਆਰਥੀ ਕੋ-ਔਪ ਸਿੱਖਿਆ, ਇੰਟਰਨਸ਼ਿਪ, ਕਲੀਨਿਕਲ ਪਲੇਸਮੈਂਟ, ਸਰਵਿਸ ਲਰਨਿੰਗ ਅਤੇ ਪ੍ਰੈਕਟੀਕਮ ਤੱਕ ਪਹੁੰਚ ਕਰ ਸਕਦੇ ਹਨ।

ਇਸ ਸਰਕਾਰ ਦਾ ਮੰਨਣਾ ਹੈ ਕਿ ਵਿਦਿਆਰਥੀਆਂ ਦਾ ਧਿਆਨ ਸਿਰਫ਼ ਉਨ੍ਹਾਂ ਦੀ ਪੜ੍ਹਾਈ ‘ਤੇ ਹੋਣਾ ਚਾਹੀਦਾ ਹੈ, ਨਾ ਕਿ ਆਪਣੇ ਲਈ ਢੁੱਕਵੀਆਂ ਰਿਹਾਇਸ਼ਾਂ ਲੱਭਣ ਅਤੇ ਆਪਣੇ ਬੱਜਟ ‘ਤੇ। 2017 ਤੋਂ, ਸਾਡੀ ਸਰਕਾਰ ਨੇ ਬੀ.ਸੀ. ਦੇ ਹਰ ਖੇਤਰ ਵਿੱਚ ਪੋਸਟ ਸੈਕੰਡਰੀ ਕੈਂਪਸਾਂ ਵਿੱਚ ਲਗਭਗ 9,095 ਨਵੇਂ ਬੈਡਾਂ ਦਾ ਨਿਰਮਾਣ ਪੂਰਾ ਕੀਤਾ ਹੈ ਜਾਂ ਸ਼ੁਰੂ ਕੀਤਾ ਹੈ। ਕੁੱਲ ਮਿਲਾ ਕੇ, ਸਾਡਾ ਸੂਬਾ ਵਿਦਿਆਰਥੀਆਂ ਲਈ 12,000 ਨਵੇਂ ਪੋਸਟ-ਸੈਕੰਡਰੀ ਬੈੱਡ ਸ਼ਾਮਲ ਕਰਨ ਦੇ ਰਾਹ ‘ਤੇ ਹੈ।

ਥੋੜ੍ਹੀ ਮਿਆਦ (short-term) ਦੇ ਸਿਖਲਾਈ ਵਿਕਲਪਾਂ ਰਾਹੀਂ ਹਜ਼ਾਰਾਂ ਲੋਕਾਂ ਨੂੰ ਨਵੇਂ ਹੁਨਰ ਅਤੇ ਮੌਕੇ ਦੇਣਾ। ਸੂਬੇ ਭਰ ਵਿੱਚ ਜਨਤਕ ਪੋਸਟ-ਸੈਕੰਡਰੀ ਸੰਸਥਾਵਾਂ ਦੁਆਰਾ ਪ੍ਰਦਾਨ ਕੀਤੀਆਂ ਜਾਣ ਵਾਲੀਆਂ ਉੱਚ-ਮੰਗ ਵਾਲੀਆਂ ਨੌਕਰੀਆਂ ਲਈ ਮਾਈਕਰੋ-ਕ੍ਰਿਡੈਨਸ਼ੀਅਲ ਸਿਖਲਾਈ ਦੀ ਲਾਗਤ ਨੂੰ ਕਵਰ ਕਰਨ ਲਈ ਇਹ ਗ੍ਰਾਂਟ $3,500 ਤੱਕ ਹੈ।

ਬ੍ਰਿਟਿਸ਼ ਕੋਲੰਬੀਆ ਵਿੱਚ ਟ੍ਰੇਡ ਦੇ ਖੇਤਰ ਨਾਲ ਸੰਬੰਧਤ ਕਾਮੇ ਸੂਬੇ ਦੀ ਨੀਂਹ ਬਣਾਉਂਦੇ ਹਨ ਜਿਸ ਦਾ ਲਾਭ ਸਾਨੂੰ ਸਭ ਨੂੰ ਹੁੰਦਾ ਹੈ। ਇਹ ਉਨ੍ਹਾਂ ਦੀ ਵਧਦੀ ਮੁਹਾਰਤ, ਹੁਨਰ ਅਤੇ ਨਵੀਨਤਾ ਹੈ ਜੋ ਵਰਤਮਾਨ ਵਿੱਚ ਬੀ.ਸੀ. ਵਿੱਚ ਯੋਗਦਾਨ ਪਾਉਂਦੀ ਹੈ ਅਤੇ ਭਵਿੱਖ ਵਿੱਚ ਯੋਗਦਾਨ ਪਾਉਣਾ ਜਾਰੀ ਰੱਖੇਗੀ। ਬ੍ਰਿਟਿਸ਼ ਕੋਲੰਬੀਆ ਵਿੱਚ ਟ੍ਰੇਡ ਦੇ ਖੇਤਰ ਨਾਲ ਸੰਬੰਧਤ ਕਾਮਿਆਂ ਕੋਲ ਹੁਣ TradeUpBC ਰਾਹੀਂ ਨਵੇਂ ਅਤੇ ਵਿਸ਼ੇਸ਼ ਸਿਖਲਾਈ ਦੇ ਮੌਕਿਆਂ ਤੱਕ ਪਹੁੰਚ ਹੈ। ਇਹ ਇੱਕ ਔਨਲਾਈਨ ਹੱਬ ਹੈ ਜੋ ਟ੍ਰੇਡ ਦੇ ਖੇਤਰ ਨਾਲ ਸੰਬੰਧਤ ਤਜਰਬੇਕਾਰ ਪੇਸ਼ੇਵਰਾਂ ਅਤੇ ਰੁਜ਼ਗਾਰ ਦੇਣ ਵਾਲਿਆਂ ਦੀ ਮਦਦ ਕਰਦਾ ਹੈ।

ਤਬਦੀਲੀਆਂ ਅਤੇ ਮੰਦੀ ਉਨ੍ਹਾਂ ਭਾਈਚਾਰਿਆਂ ਲਈ ਮੁਸ਼ਕਲ ਹੋ ਸਕਦੀ ਹੈ ਜੋ ਜੰਗਲਾਤ ਖੇਤਰ ‘ਤੇ ਨਿਰਭਰ ਕਰਦੇ ਹਨ, ਅਤੇ ਸਾਡੀ ਸਰਕਾਰ ਉਨ੍ਹਾਂ ਦੀ ਮਦਦ ਲਈ ਮੌਜੂਦ ਹੈ। ਸੂਬੇ ਦੇ ਫੌਰੈਸਟ ਇੰਪਲੌਇਮੈਂਟ ਪ੍ਰੋਗਰਾਮ (FEP) ਦੇ ਤਹਿਤ ਬੀ.ਸੀ. ਦੇ ਪੇਂਡੂ ਇਲਾਕਿਆਂ ਵਿੱਚ ਕੌਂਟਰੈਕਟਰਾਂ ਅਤੇ ਜੰਗਲਾਤ ਦੇ ਕਾਮਿਆਂ ਲਈ ਰੁਜ਼ਗਾਰ ਦੇ ਵਧੇਰੇ ਮੌਕੇ ਆਉਣ ਵਾਲੇ ਹਨ।

ਮੈਨਿਊਫਕਚਰਿੰਗ ਸਾਡੀ ਅਰਥਵਿਵਸਥਾ ਦਾ ਇੱਕ ਵਧ ਰਿਹਾ ਹਿੱਸਾ ਹੈ ਅਤੇ ਅਗਲੇ 10 ਸਾਲਾਂ ਵਿੱਚ ਇਸ ਖੇਤਰ ਵਿੱਚ 49,000 ਨਵੀਆਂ ਨੌਕਰੀਆਂ ਦੇ ਮੌਕੇ ਆਉਣਗੇ। ਹੁਣ ਸਮਾਂ ਆ ਗਿਆ ਹੈ ਕਿ ਨੌਜਵਾਨਾਂ ਨੂੰ ਇਸ ਖੇਤਰ ਨਾਲ ਜਾਣੂ ਕਰਵਾਇਆ ਜਾਵੇ ਤਾਂ ਜੋ ਉਹ ਉਨ੍ਹਾਂ ਨੌਕਰੀਆਂ ਨੂੰ ਭਰਨ ਲਈ ਤਿਆਰ ਹੋਣ। ਸੈਕੰਡਰੀ ਸਕੂਲ ਦੇ ਵਿਦਿਆਰਥੀਆਂ ਅਤੇ ਹਾਲ ਹੀ ਦੇ ਗ੍ਰੈਜੂਏਟਾਂ ਨੂੰ ਭਵਿੱਖ ਦੇ ਕਾਰਜਬਲ ਬਣਾਉਣ ਵਿੱਚ ਮਦਦ ਕਰਨ ਲਈ ਤਿਆਰ ਕੀਤੇ ਗਏ ਇੱਕ ਨਵੇਂ ਪ੍ਰੋਗਰਾਮ ਰਾਹੀਂ ਸਥਾਨਕ ਮੈਨਿਊਫਕਚਰਾਂ ਦੀ ਥੋੜ੍ਹੀ ਮਿਆਦ ਦੀਆਂ, ਤਨਖਾਹ ਵਾਲੇ ਕੰਮ ਦੀਆਂ ਪਲੇਸਮੈਂਟਾਂ ਤੱਕ ਪਹੁੰਚ ਹੈ।

ਕੰਸਟ੍ਰਕਸ਼ਨ ਦੇ ਖੇਤਰ ਵਿੱਚ ਰੁਜ਼ਗਾਰ ਦੇਣ ਵਾਲਿਆਂ ਅਤੇ ਕਾਮਿਆਂ ਨੂੰ ਬਿਹਤਰ ਸਮਰਥਨ ਮਿਲਦਾ ਹੈ ਕਿਉਂਕਿ ਸੂਬੇ ਨੇ ‘ਵਰਕਪਲੇਸ ਇਨੋਵੇਸ਼ਨ ਫੰਡ’ (Workplace Innovation Fund) ਦੀ ਸ਼ੁਰੂਆਤ ਕੀਤੀ, ਜੋ ਕਿ ਉਤਪਾਦਕਤਾ ਅਤੇ ਕਰਮਚਾਰੀਆਂ ਨੂੰ ਬਰਕਰਾਰ ਰੱਖਣ ਦੇ ਨਵੇਂ ਤਰੀਕਿਆਂ ਦੇ ਨਾਲ-ਨਾਲ ਲੇਬਰ ਸਪਲਾਈ ਅਤੇ ਸ਼ਮੂਲੀਅਤ ‘ਤੇ ਕੇਂਦਰਿਤ ਇੱਕ ਪ੍ਰੋਗਰਾਮ ਹੈ। ‘ਵਰਕਪਲੇਸ ਇਨੋਵੇਸ਼ਨ ਫੰਡ’ ਸੈਕਟਰ-ਵਿਆਪਕ ਹੱਲ ਵਿਕਸਤ ਕਰਨ ਦੇ ਆਲੇ-ਦੁਆਲੇ ਕੇਂਦਰਿਤ ਹੈ ਜੋ ਨਿਰਮਾਣ ਉਤਪਾਦਕਤਾ ਨੂੰ ਵਧਾਉਣ ਅਤੇ ਅੱਗੇ ਆਉਣ ਵਾਲੀਆਂ ਚੁਣੌਤੀਆਂ ਲਈ ਹੁਨਰਮੰਦ ਕਰਮਚਾਰੀਆਂ ਨੂੰ ਤਿਆਰ ਕਰਨ ਵਿੱਚ ਮਦਦ ਕਰ ਸਕਦਾ ਹੈ।

ਪੋਸਟ-ਸੈਕੰਡਰੀ ਟਿਊਸ਼ਨ ਦੇ ਖ਼ਰਚਿਆਂ ਵਿੱਚ ਮਦਦ ਲਈ ਸਾਬਕਾ ਸੰਭਾਲ ਵਿੱਚ ਰਹੇ ਨੌਜਵਾਨਾਂ ਲਈ ਹੁਣ ਕੋਈ ਉਮਰ ਸੀਮਾ ਨਹੀਂ ਹੈ। ਉਮਰ ਸੀਮਾ ਨੂੰ ਹਟਾਉਣ ਨਾਲ ਲਾਗਤ ਦੀਆਂ ਰੁਕਾਵਟਾਂ ਦੂਰ ਹੋਣਗੀਆਂ ਅਤੇ ਲੋਕਾਂ ਨੂੰ ਚੰਗੀ ਤਨਖਾਹ ਅਤੇ ਸੰਤੁਸ਼ਟੀਜਨਕ ਨੌਕਰੀਆਂ ਪ੍ਰਾਪਤ ਕਰਨ ਵਿੱਚ ਸਹਾਇਤਾ ਮਿਲੇਗੀ। ‘ਪ੍ਰੋਵਿੰਸ਼ੀਅਲ ਟਿਊਸ਼ਨ ਵੇਵਰ ਪ੍ਰੋਗਰਾਮ’ (Provincial Tuition Waiver Program) ਬਹੁਤ ਸਾਰੇ ਵਿਕਲਪਾਂ ਨੂੰ ਕਵਰ ਕਰਦਾ ਹੈ: ਸਰਟੀਫਿਕੇਟ ਪ੍ਰੋਗਰਾਮ, ਡਿਪਲੋਮਾ ਜਾਂ ਅੰਡਰਗ੍ਰੈਜੂਏਟ ਡਿਗਰੀ, ਗੈਰ-ਕ੍ਰੈਡਿਟ ਕੋਰਸ, ਅਪ੍ਰੈਂਟਿਸਸ਼ਿਪ ਪ੍ਰੋਗਰਾਮ ਅਤੇ ਐਜੂਕੇਸ਼ਨ ਕੋਰਸਾਂ ਨੂੰ ਜਾਰੀ ਰੱਖਣਾ।

ਸਿੱਖਿਆ ਅਤੇ ਹੁਨਰ ਸਿਖਲਾਈ ਅਹਿਮ ਸੰਤੁਲਨ ਪ੍ਰਦਾਨ ਕਰਦੇ ਹਨ, ਜੋ ਜੀਵਨ ਨੂੰ ਬਦਲਣ ਵਿੱਚ ਮਦਦ ਕਰ ਸਕਦਾ ਹੈ। ਸਹੀ ਸਹਾਇਤਾ ਨਾਲ, ਅਸੀਂ ਲੋਕਾਂ ਨੂੰ ਕਾਰਜਬਲ ਵਿੱਚ ਦਾਖਲ ਹੋਣ ਲਈ ਉਨ੍ਹਾਂ ਦੀਆਂ ਚੁਣੌਤੀਆਂ ਨੂੰ ਦੂਰ ਕਰਨ ਵਿੱਚ ਮਦਦ ਕਰ ਸਕਦੇ ਹਾਂ, ਅਤੇ ਉਨ੍ਹਾਂ ਨੂੰ ਇੱਕ ਨਵੀਂ, ਵਧੀਆ ਅਤੇ ਸਾਰਥਕ ਨੌਕਰੀ ਵਿੱਚ ਵਧਣ-ਫੁੱਲਣ ਵਿੱਚ ਮਦਦ ਕਰ ਸਕਦੇ ਹਾਂ। ਉਹ ਲੋਕ ਜੋ ਕਾਰਜਬਲ ਵਿੱਚ ਸ਼ਾਮਲ ਹੋਣਾ ਚਾਹੁੰਦੇ ਹਨ ਪਰ ਰੁਜ਼ਗਾਰ ਲਈ ਕਈ ਰੁਕਾਵਟਾਂ ਦਾ ਸਾਹਮਣਾ ਕਰ ਰਹੇ ਹਨ, ਉਨ੍ਹਾਂ ਕੋਲ ਵਧੇਰੇ ਮੌਕੇ ਹੋਣਗੇ ਕਿਉਂਕਿ ਬੀ.ਸੀ. ਸਰਕਾਰ ਰੁਜ਼ਗਾਰ ਪ੍ਰੋਗਰਾਮਾਂ ਲਈ ਹੁਨਰ ਸਿਖਲਾਈ ਦਾ ਮਹੱਤਵਪੂਰਨ ਵਿਸਤਾਰ ਕਰ ਰਹੀ ਹੈ।

ਅਸੀਂ ਬੀ.ਸੀ. ਵਿੱਚ ਆਕੇ ਰਹਿਣ ਵਾਲੇ ਲੋਕਾਂ ਨੂੰ ਆਪਣੇ ਪੇਸ਼ਿਆਂ ਵਿੱਚ ਆਪਣੇ ਹੁਨਰਾਂ ਦੀ ਤੇਜ਼ੀ ਨਾਲ ਵਰਤੋਂ ਕਰਨ ਵਿੱਚ ਮਦਦ ਕਰਨ ਲਈ ਕਾਰਵਾਈ ਕਰ ਰਹੇ ਹਾਂ। ਇਹ ਉਸ ਤਰੱਕੀ ਨੂੰ ਅੱਗੇ ਵਧਾਉਂਦਾ ਹੈ ਜੋ ਅਸੀਂ ਪਹਿਲਾਂ ਹੀ ਕੀਤੀ ਹੈ ਤਾਂ ਜੋ ਅੰਤਰਰਾਸ਼ਟਰੀ ਪੱਧਰ ‘ਤੇ ਸਿਖਲਾਈ ਪ੍ਰਾਪਤ ਹੈਲਥ ਕੇਅਰ ਵਰਕਰਾਂ ਲਈ ਸਿਹਤ ਸੰਭਾਲ ਖੇਤਰ ਵਿੱਚ ਕਾਮਿਆਂ ਦੀ ਘਾਟ ਨੂੰ ਪੂਰਾ ਕਰਨਾ ਹੋਰ ਤੇਜ਼ ਅਤੇ ਆਸਾਨ ਬਣਾਇਆ ਜਾ ਸਕੇ। ਇਸ ਨਾਲ ਬੀ.ਸੀ. ਨੂੰ ਉੱਚ ਮੰਗ ਵਾਲੀਆਂ ਨੌਕਰੀਆਂ ਲਈ ਮੌਜੂਦਾ ਅਤੇ ਭਵਿੱਖ ਦੀਆਂ ਜ਼ਰੂਰਤਾਂ ਨੂੰ ਪੂਰਾ ਕਰਨ ਅਤੇ ਆਰਥਿਕਤਾ ਨੂੰ ਮਜ਼ਬੂਤ ਕਰਨ ਵਿੱਚ ਮਦਦ ਮਿਲੇਗੀ।

ਬੀ.ਸੀ. ਅਗਲੇ ਦਹਾਕੇ ਵਿੱਚ ਲਗਭਗ ਇੱਕ ਮਿਲੀਅਨ ਨੌਕਰੀਆਂ ਦੇ ਮੌਕੇ ਪੈਦਾ ਹੋਣ ਦੀ ਉਮੀਦ ਕਰ ਰਿਹਾ ਹੈ। ਨਵਾਂ ‘ਫਾਈਂਡ ਯੌਰ ਪਾਥ’ (Find Your Path) ਡਿਜੀਟਲ ਟੂਲ ਰੁਜ਼ਗਾਰ ਦੇਣ ਵਾਲਿਆਂ, ਕਾਮਿਆਂ ਅਤੇ ਵਿਦਿਆਰਥੀਆਂ ਨੂੰ 250 ਤੋਂ ਵੱਧ ਉੱਚ ਮੰਗ ਵਾਲੇ ਪੇਸ਼ਿਆਂ ਲਈ ਵਿਦਿਅਕ ਮਾਰਗਾਂ ਦੀ ਪੜਚੋਲ ਕਰਨ ਅਤੇ ਤਿਆਰ ਕਰਨ ਵਿੱਚ ਸਹਾਇਤਾ ਕਰਨ ਲਈ ਡਿਜ਼ਾਈਨ ਕੀਤਾ ਗਿਆ ਹੈ। ਇਸ ਬਾਰੇ ਉਤਸੁਕ ਹੋ ਕਿ ਤੁਹਾਡੀ ਸਿੱਖਿਆ ਤੁਹਾਨੂੰ ਕਿੱਥੇ ਲੈ ਜਾ ਸਕਦੀ ਹੈ? ਪੱਕਾ ਨਹੀਂ ਪਤਾ ਹੈ ਕਿ ਆਪਣੇ ਸੁਪਨੇ ਦੀ ਨੌਕਰੀ ਤੱਕ ਕਿਵੇਂ ਪਹੁੰਚਣਾ ਹੈ? ਅੱਜ ਹੀ ਸ਼ੁਰੂਆਤ ਕਰੋ ਅਤੇ ਇੱਕ ਸਫਲ ਭਵਿੱਖ ਵੱਲ ਆਪਣਾ ਰਸਤਾ ਤਿਆਰ ਕਰੋ।

ਅਸੀਂ 2027 ਤੱਕ ਬੀ.ਸੀ. ਵਿੱਚ ਵੱਖ-ਵੱਖ ਇਲਾਕਿਆਂ ਵਿੱਚ ਡਿਜੀਟਲ ਕਮੀਆਂ ਨੂੰ ਖਤਮ ਕਰਨ ਲਈ ਫੈਡਰਲ ਸਰਕਾਰ ਨਾਲ ਭਾਈਵਾਲੀ ਕੀਤੀ ਹੈ – ਜਿਸਦਾ ਮਤਲਬ ਹੈ ਕਿ ਬੀ.ਸੀ. ਦੇ ਹਰ ਭਾਈਚਾਰੇ, ਜਿਸ ਵਿੱਚ ਸਭ ਤੋਂ ਵੱਧ ਪੇਂਡੂ ਅਤੇ ਦੂਰ-ਦੁਰਾਡੇ ਦੇ ਲੋਕ ਸ਼ਾਮਲ ਹਨ, ਨੂੰ ਇਸ ਦਹਾਕੇ ਦੇ ਅੰਤ ਤੋਂ ਪਹਿਲਾਂ ਹਾਈ-ਸਪੀਡ ਇੰਟਰਨੈਟ ਦੀ ਪਹੁੰਚ ਹੋਵੇਗੀ।

ਅਸੀਂ 37,000 ਤੋਂ ਵੱਧ ਨਵੀਆਂ ਲਾਇਸੰਸਸ਼ੁਦਾ ਚਾਈਲਡ ਕੇਅਰ ਥਾਂਵਾਂ ਨੂੰ ਫੰਡ ਦਿੱਤਾ ਹੈ, ਜੋ ਬੀ.ਸੀ. ਦੇ ਇਤਿਹਾਸ ਵਿੱਚ ਨਵੀਆਂ ਚਾਈਲਡ ਕੇਅਰ ਥਾਂਵਾਂ ਬਣਾਉਣ ਲਈ ਸਭ ਤੋਂ ਵੱਡੀ ਕਾਰਵਾਈ ਹੈ ਅਤੇ ਇਹ ਮਾਪਿਆਂ ਨੂੰ ਕਾਰਜਬਲ ਵਿੱਚ ਦੁਬਾਰਾ ਸ਼ਾਮਲ ਹੋਣ ਦੇ ਸਮਰੱਥ ਕਰਦਾ ਹੈ।

ਅਸੀਂ ਨਵੀਂ ਬੀ.ਸੀ. ਐਕਸੈਸ ਗ੍ਰਾਂਟ (B.C. Access Grant) ਪੇਸ਼ ਕੀਤੀ ਜੋ ਅੱਜ ਤੱਕ 71,000 ਤੋਂ ਵੱਧ, ਘੱਟ ਅਤੇ ਮੱਧ-ਆਮਦਨੀ ਵਾਲੇ ਵਿਦਿਆਰਥੀਆਂ ਨੂੰ ਟਿਊਸ਼ਨ, ਪਾਠ ਪੁਸਤਕਾਂ, ਲੈਬ ਸਪਲਾਈਆਂ ਅਤੇ ਉਨ੍ਹਾਂ ਦੀ ਸਿਖਲਾਈ ਦੇ ਪ੍ਰੋਗਰਾਮ ਲਈ ਲੋੜੀਂਦੀਆਂ ਹੋਰ ਚੀਜ਼ਾਂ ਲਈ ਭੁਗਤਾਨ ਕਰਨ ਲਈ ਸਲਾਨਾ $4,000 ਤੱਕ ਦੀ ਸਹਾਇਤਾ ਕਰਦੀ ਹੈ। ਇਹ ਗ੍ਰਾਂਟ 2020 ਵਿੱਚ ਸ਼ੁਰੂ ਕੀਤੀ ਗਈ ਸੀ, ਜੋ 15 ਸਾਲਾਂ ਵਿੱਚ ਪਹਿਲਾ ਨਵਾਂ ਗ੍ਰਾਂਟ ਪ੍ਰੋਗਰਾਮ ਸੀ।

ਬਹੁਤ ਲੰਬੇ ਸਮੇਂ ਤੋਂ, ਬੀ.ਸੀ. ਕੈਨੇਡਾ ਦਾ ਇਕਲੌਤਾ ਸੂਬਾ ਰਿਹਾ ਹੈ ਜਿਸ ਕੋਲ ‘ਸਕਿੱਲਡ ਟ੍ਰੇਡਜ਼’ ਸਰਟੀਫਿਕੇਸ਼ਨ ਸਿਸਟਮ ਨਹੀਂ ਹੈ, ਜਿਸ ਨਾਲ ਕਾਮਿਆਂ ਅਤੇ ਮਾਲਕਾਂ ਨੂੰ ਨੁਕਸਾਨ ਹੁੰਦਾ ਹੈ। ਹੁਨਰਮੰਦ ਕਿੱਤਿਆਂ ਦੇ ਸਰਟੀਫਿਕੇਸ਼ਨ ਨੂੰ ਵਾਪਸ ਲਿਆ ਕੇ ਅਤੇ ਵਧਾ ਕੇ, ਅਸੀਂ ਇਸ ਨੂੰ ਬਦਲ ਰਹੇ ਹਾਂ – ਵਧੇਰੇ ਲੋਕਾਂ ਨੂੰ ਕਿੱਤਿਆਂ ਵੱਲ ਆਕਰਸ਼ਿਤ ਕਰਨ ਲਈ ਬਿਹਤਰ ਤਨਖਾਹ ਵਾਲੇ, ਸਥਿਰ ਕੰਮ ਦਾ ਸਮਰਥਨ ਕਰਨਾ ਅਤੇ ਮਾਲਕਾਂ ਨੂੰ ਹੋਰ ਮਜ਼ਬੂਤ ਭਾਈਚਾਰਿਆਂ ਅਤੇ ਵਧੇਰੇ ਮਜ਼ਬੂਤ ਬੀ.ਸੀ. ਬਣਾਉਣ ਲਈ ਲੋੜੀਂਦੇ ਕਾਮਿਆਂ ਨੂੰ ਲੱਭਣ ਵਿੱਚ ਸਹਾਇਤਾ ਕਰਨਾ।

ਬੀ.ਸੀ. ਵਾਤਾਵਰਨ ਪੱਖੋਂ ਸਾਫ ਊਰਜਾ ਦਾ ਸਮਰਥਕ ਹੈ। ਅਸੀਂ ਬੀ.ਸੀ. ਦੇ ਬਿਜਲੀ ਦੇ ਸਿਸਟਮ ਦੇ $36 ਬਿਲੀਅਨ ਦੇ ਵਿਸਤਾਰ, 12,500 ਤੋਂ ਵੱਧ ਚੰਗੀਆਂ ਨੌਕਰੀਆਂ ਪੈਦਾ ਕਰਨ ਅਤੇ ਕਾਰੋਬਾਰਾਂ ਅਤੇ ਭਾਈਚਾਰਿਆਂ ਨੂੰ ਵਧਣ ਅਤੇ ਨਿਵੇਸ਼ ਨੂੰ ਆਕਰਸ਼ਿਤ ਕਰਨ ਲਈ ਵਾਤਾਵਰਨ ਪੱਖੋਂ ਸਾਫ, ਕਿਫ਼ਾਇਤੀ ਬਿਜਲੀ ਤੱਕ ਪਹੁੰਚ ਨੂੰ ਯਕੀਨੀ ਬਣਾਉਣ ਵਰਗੇ ਹੱਲਾਂ ਵਿੱਚ ਨਿਵੇਸ਼ ਕਰਕੇ ਬੀ.ਸੀ. ਦੀ ਵਾਤਾਵਰਨ ਪੱਖੋਂ ਸਾਫ ਊਰਜਾ ਸ਼ਕਤੀ ਦਾ ਲਾਭ ਉਠਾ ਰਹੇ ਹਾਂ।

‘ਐਸਪੈਕਟ ਬਾਇਓਸਿਸਟਮਜ਼’ (Aspect Biosystems) ਅਤੇ ਬੀ.ਸੀ. ਅਤੇ ਕੈਨੇਡਾ ਦੀਆਂ ਸਰਕਾਰਾਂ ਵਿਚਕਾਰ ਲਗਭਗ $200 ਮਿਲੀਅਨ ਦੀ ਭਾਈਵਾਲੀ 200 ਤੋਂ ਵੱਧ ਨੌਕਰੀਆਂ ਪੈਦਾ ਕਰੇਗੀ ਅਤੇ ਬੀ.ਸੀ. ਅਤੇ ਵਿਸ਼ਵ ਭਰ ਦੇ ਲੋਕਾਂ ਲਈ ਅਤਿ ਆਧੁਨਿਕ ਬਾਇਓਪ੍ਰਿੰਟਡ ਟਿਸ਼ੂ ਥੈਰੇਪਿਊਟਿਕਸ ਦੇ ਵਿਕਾਸ ਨੂੰ ਅੱਗੇ ਵਧਾਏਗੀ।

‘ਪੋਰਟ ਔਫ ਪ੍ਰਿੰਸ ਰੂਪਰਟ’ ਦਾ $750 ਮਿਲੀਅਨ ਦਾ ਰਿਡਲੀ ਆਇਲੈਂਡ ਐਕਸਪੋਰਟ ਲੌਜਿਸਟਿਕਸ ਪ੍ਰੋਜੈਕਟ (Ridley Island Export Logistics Project), ਕੰਸਟ੍ਰਕਸ਼ਨ ਸੰਬੰਧੀ 200 ਨੌਕਰੀਆਂ ਪੈਦਾ ਕਰੇਗਾ ਅਤੇ ਪੋਰਟ (ਬੰਦਰਗਾਹ) ਦੀ ਟਰੱਕ ਸਮਰੱਥਾ ਵਿੱਚ 1,200 ਰੋਜ਼ਾਨਾ ‘ਰਿਟਰਨ ਟਰਿੱਪ’ ਜੋੜੇਗਾ।

ਕੈਰੀ ਲੇਕ ਇੰਡੀਅਨ ਰਿਜ਼ਰਵ (Kerry Lake Indian Reserve) ‘ਤੇ $7 ਬਿਲੀਅਨ ਦਾ ਨੈਟ-ਜ਼ੀਰੋ ਨਿਕਾਸ Tse’Khene ਹਾਈਡ੍ਰੋਜਨ ਊਰਜਾ ਕੇਂਦਰ ਕੈਨੇਡਾ ਦੇ ਸਭ ਤੋਂ ਵੱਡੇ ਇੰਡੀਜਨਸ ਊਰਜਾ ਪ੍ਰੋਜੈਕਟਾਂ ਵਿੱਚੋਂ ਇੱਕ ਹੈ, ਜੋ 500 ਚੰਗੀਆਂ ਸਥਾਈ ਨੌਕਰੀਆਂ ਅਤੇ 1,500 ਕੰਸਟ੍ਰਕਸ਼ਨ ਸੰਬੰਧੀ ਨੌਕਰੀਆਂ ਪੈਦਾ ਕਰਦਾ ਹੈ।

ਬਰਨਬੀ, ਨਨਾਇਮੋ, ਪ੍ਰਿੰਸ ਜੌਰਜ ਅਤੇ ਨੌਰਥ ਵੈਨਕੂਵਰ ਵਿੱਚ ਪ੍ਰਮੁੱਖ ਕੇਂਦਰਾਂ ਦੇ ਨਾਲ 18 ਹਾਈਡ੍ਰੋਜਨ ਰਿਫਿਊਲਿੰਗ ਸਟੇਸ਼ਨਾਂ ਦੇ ਸੂਬਾਈ ਨੈਟਵਰਕ ਦੇ ਨਿਰਮਾਣ ਅਤੇ ਸੰਚਾਲਨ ਲਈ HTEC ਦਾ $900 ਮਿਲੀਅਨ ਦਾ H2 ਗੇਟਵੇਅ ਪ੍ਰੋਜੈਕਟ, ਬੀ.ਸੀ. ਭਰ ਵਿੱਚ 280 ਤੋਂ ਵੱਧ ਫੁੱਲ-ਟਾਈਮ ਨੌਕਰੀਆਂ ਪੈਦਾ ਕਰੇਗਾ।

‘ਆਰਟੇਮਿਸ ਗੋਲਡ’ (Artemis Gold) ਦੀ $730 ਮਿਲੀਅਨ ਦੀ ‘ਬਲੈਕਵਾਟਰ ਮਾਈਨ’ (Blackwater Mine) ਲਗਭਗ ਇੱਕ ਦਹਾਕੇ ਵਿੱਚ ਬੀ.ਸੀ. ਦੀ ਪਹਿਲੀ ਨਵੀਂ ਓਪਨ-ਪਿੱਟ ਖਾਨ ਹੈ, ਅਤੇ ਇਸਨੂੰ ਸਿਰਫ 10 ਮਹੀਨਿਆਂ ਵਿੱਚ ਓਪਰੇਟਿੰਗ ਪਰਮਿਟ ਮਿਲਿਆ ਹੈ, ਜਿਸ ਨਾਲ 450 ਸਥਾਈ ਨੌਕਰੀਆਂ ਜਲਦੀ ਹੀ ਪੈਦਾ ਹੋਣ ਵਾਲੀਆਂ ਹਨ।

ਵਿਲੀਅਮਜ਼ ਲੇਕ ਵਿੱਚ ਕੈਨੇਡਾ ਦੀ $75 ਮਿਲੀਅਨ ਦੀ ਨਵੀਂ ਵਿਸ਼ਵ ਪੱਧਰੀ 8,400 square-metre (91,000 square foot) ਮਾਸ ਟਿੰਬਰ ਅਤੇ ਪ੍ਰੀ-ਫੈਬ੍ਰੀਕੇਸ਼ਨ ਫੈਸਿਲਿਟੀ 70 ਤੋਂ ਵੱਧ ਤਨਖਾਹ ਵਾਲੀਆਂ ਸਥਾਈ ਨੌਕਰੀਆਂ ਅਤੇ ਸਾਡੇ ਕੁਦਰਤੀ ਸਰੋਤਾਂ ਲਈ ਉੱਚ ਮੁੱਲ ਪੈਦਾ ਕਰੇਗੀ।

$66 ਮਿਲੀਅਨ ਦਾ ਟੋਲਕੋ ਇੰਡਸਟਰੀਜ਼ (Tolko Industries) ਮਿੱਲ ਪ੍ਰੋਜੈਕਟ ਵਿਸ਼ੇਸ਼ਤਾ, ਉਦਯੋਗਿਕ ਅਤੇ ਇੰਜੀਨੀਅਰਡ ਲੱਕੜ ਉਤਪਾਦਾਂ ਨੂੰ ਸ਼ਾਮਲ ਕਰਨ ਲਈ ਉਤਪਾਦਨ ਵਿੱਚ ਵਿਭਿੰਨਤਾ ਲਿਆਏਗਾ।

ਪ੍ਰਾਈਵੇਟ ਸੈਕਟਰ ਦਾ ਨਵਾਂ ਮੈਨਿਊਫੈਕਚਰਿੰਗ ਪਲਾਂਟ ਬੀ.ਸੀ. ਵਿੱਚ 450 ਸਥਾਈ, ਚੰਗੀ ਤਨਖਾਹ ਵਾਲੀਆਂ, ਵਾਤਾਵਰਨ ਪੱਖੋਂ ਸਾਫ਼ ਨੌਕਰੀਆਂ ਲਿਆਏਗਾ। ਇਹ ਪਲਾਂਟ ਲਿਥੀਅਮ ਆਇਨ ਬੈਟਰੀ ਸੈੱਲਾਂ ਦਾ ਉਤਪਾਦਨ ਕਰੇਗਾ – ਜਿਸ ਦੀ ਵਰਤੋਂ ਵੈਕਿਊਮ, ਪਾਵਰ ਟੂਲ ਅਤੇ ਮੈਡੀਕਲ ਉਪਕਰਣਾਂ ਵਰਗੀਆਂ ਚੀਜ਼ਾਂ ਵਿੱਚ ਕੀਤੀ ਜਾਂਦੀ ਹੈ। ਇਹ ਪਹਿਲਕਦਮੀ ਉਨ੍ਹਾਂ ਤਰੀਕਿਆਂ ਵਿੱਚੋਂ ਇੱਕ ਹੈ ਜਿਸ ਨਾਲ ਅਸੀਂ ਬੀ.ਸੀ. ਨੂੰ ਵਾਤਾਵਰਨ ਪੱਖੋਂ ਸਾਫ਼ ਤਕਨਾਲੋਜੀ ਵਿੱਚ ਇੱਕ ਮੋਢੀ ਵਜੋਂ ਸਥਾਪਤ ਕਰਨ ਅਤੇ ਬਿਹਤਰ ਭਵਿੱਖ ਲਈ ਸਾਡੇ ਕਲੀਨ ਬੀ ਸੀ (CleanBC) ਜਲਵਾਯੂ ਕਾਰਜ ਟੀਚਿਆਂ ਨੂੰ ਪੂਰਾ ਕਰਨ ਲਈ ਕੰਮ ਕਰ ਰਹੇ ਹਾਂ।

ਵੈਨਕੂਵਰ ਵਿੱਚ AbCellera ਦਾ ਨਵਾਂ $701 ਮਿਲੀਅਨ ਦਾ ਅਤਿ-ਆਧੁਨਿਕ ਬਾਇਓਟੈਕਨਾਲੋਜੀ ਕੈਂਪਸ ਬੀ.ਸੀ. ਦੇ ਇਤਿਹਾਸ ਵਿੱਚ ਜੀਵਨ-ਵਿਗਿਆਨ (life-science) ਪ੍ਰੋਜੈਕਟ ਵਿੱਚ ਸਭ ਤੋਂ ਵੱਡਾ ਇਕੱਲਾ ਪ੍ਰਾਈਵੇਟ ਨਿਵੇਸ਼ ਹੈ, ਜਿਸ ਨੇ 400 ਤੋਂ ਵੱਧ ਉੱਚ-ਹੁਨਰ ਵਾਲੀਆਂ ਨੌਕਰੀਆਂ ਅਤੇ ਜੀਵਨ ਵਿਗਿਆਨ ਅਤੇ ਬਾਇਓ ਮੈਨਿਊਫੈਕਚਰਿੰਗ ਵਿੱਚ ਨਵੇਂ ਸਿਖਲਾਈ ਦੇ ਮੌਕੇ ਪੈਦਾ ਕੀਤੇ ਹਨ।

ਐਬਟਸਫੋਰਡ ਵਿੱਚ ‘ਵਾਇਟੈਲਸ ਨਿਊਟ੍ਰੀਸ਼ਨ’ (Vitalus Nutrition) ਦੀ ਫੈਸਿਲਿਟੀ ਦਾ ਵਿਸਤਾਰ ਬੀ.ਸੀ. ਦੀ ਦੁੱਧ ਪ੍ਰੋਸੈਸਿੰਗ ਸਮਰੱਥਾ ਨੂੰ 50٪ ਵਧਾ ਕੇ, ਖੇਤਰ ਵਿੱਚ ਦੁੱਧ ਉਤਪਾਦਕਾਂ ਦੀ ਸਹਾਇਤਾ ਕਰੇਗਾ ਅਤੇ ਇਹ ਸਾਈਟ ‘ਤੇ 100 ਵਧੇਰੇ ਨੌਕਰੀਆਂ ਪੈਦਾ ਕਰੇਗਾ।

ਇਲੈਕਟ੍ਰਿਕ ਵਾਹਨ, ਬੀ.ਸੀ. ਵਿੱਚ ਵੇਚੇ ਗਏ ਸਾਰੇ ਨਵੇਂ ਲਾਈਟ-ਡਿਊਟੀ ਯਾਤਰੀ ਵਾਹਨਾਂ ਦਾ ਲਗਭਗ 21٪ ਹਿੱਸਾ ਹਨ, ਜੋ ਕਿ ਕੈਨੇਡਾ ਦੇ ਕਿਸੇ ਵੀ ਸੂਬੇ ਜਾਂ ਖੇਤਰ ਲਈ ਸਭ ਤੋਂ ਵੱਧ ਹੈ, ਅਤੇ ਜਿਸ ਨੇ ਹੁਣ $2 ਬਿਲੀਅਨ ਦੇ ਸੂਬਾਈ EV ਸੈਕਟਰ ਨੂੰ 11,000 ਨੌਕਰੀਆਂ ਤੱਕ ਵਧਣ ਦੇ ਸਮਰੱਥ ਬਣਾਇਆ ਹੈ।

ਪ੍ਰਿੰਸ ਜੌਰਜ ਕੈਨੇਡਾ ਦੀ ਪਹਿਲੀ ਸੁਤੰਤਰ ‘ਰੀਨਿਊਏਬਲ ਡੀਜ਼ਲ ਰਿਫਾਇਨਰੀ’ ਦਾ ਘਰ ਹੈ ਅਤੇ ਸਾਫ ਹਾਈਡ੍ਰੋਜਨ ਲਈ ਇੱਕ ਵਧ ਰਿਹਾ ਪ੍ਰਮੁੱਖ ਕੇਂਦਰ ਹੈ, ਜਿਸ ਵਿੱਚ ਕੈਨਫੋਰ ਦੀ ਪਲਪ ਮਿੱਲ ਨੂੰ ਬਿਜਲੀ ਦੇਣ ਲਈ ‘ਟੇਰਾਲਟਾ ਹਾਈਡ੍ਰੋਜਨ ਸਲਿਊਸ਼ਨਜ਼’ (Teralta Hydrogen Solutions) ਦੇ ਪ੍ਰੋਜੈਕਟ ਵਰਗੇ ਪ੍ਰੋਜੈਕਟ ਹਨ।

ਬੀ ਸੀ ਮੈਨਿਊਫੈਕਚਰਿੰਗ ਜੌਬਜ਼ ਫੰਡ ਰਾਹੀਂ ਅਸੀਂ ਸਥਾਨਕ ਭਾਈਚਾਰਿਆਂ ਵਿੱਚ ਬੀ.ਸੀ. ਵਿੱਚ ਤਿਆਰ (made-in-B.C.) ਲੱਕੜ ਨਿਰਮਾਣ ਅਤੇ ਜੰਗਲਾਤ ਕਾਰਜਾਂ ਵਿੱਚ ਪ੍ਰਾਈਵੇਟ ਸੈਕਟਰ ਦੇ ਪੂੰਜੀ ਨਿਵੇਸ਼ਾਂ ਵਿੱਚ $500 ਮਿਲੀਅਨ ਤੋਂ ਵੱਧ ਦਾ ਲਾਭ ਉਠਾਇਆ ਹੈ। ਇਹ ਨਿਵੇਸ਼ 2,500 ਤੋਂ ਵੱਧ ਨੌਕਰੀਆਂ ਸੁਰੱਖਿਅਤ ਕਰ ਰਹੇ ਹਨ, ਪੈਦਾ ਕਰ ਰਹੇ ਹਨ, ਅਤੇ ਇਹ ਭਵਿੱਖ ਵਿੱਚ ਹੋਰ ਨੌਕਰੀਆਂ ਉਪਲਬਧ ਵੀ ਕਰਵਾਉਣਗੇ।